” صباح نهار جديد ” ” ادهم صحي بدري صلي الصبح وطلع علي شقته فتح الباب كانت عزاله كلها منصوبه دخل الشقه فتح الشبابيك كلها وفونه رن ” ادهم ببتسامه : لاء اقلق عليكي ايه اللي مصحيكي بدري كدا نهال ضحكت بخفه : بنجهز الحجات اللي هتيجي عندكم وخشب المطبخ لسه واصل من شويه كانو بينزلوه ادهم : يووم شاق من اوله عندك انا يدوب صليت وطلعت افتح شبابيك الشقه ونازل تاني علشان افطر انتي هتيجي تفرشي معاهم ولا لاء ؟
نهال : لاء ماما وطنط نجوي مرات عمي هما اللي هيجو بس هيفرشو الشقه بس عندي طلب ادهم : اطلبي نهال بإحراج : ممكن لما الشقه كلها تتفرش وتخلص تخلي معاك مفتاح اوضة النوم محدش يدخلها اللي عايز يتفرج يتفرج بس محدش يدخل اوضة النوم ادهم بستغراب : ولا حد داخل اوضة النوم ولا حد طالع الشقه مين اللي هيطلع يتفرج ويتفرج علي ايه اصلا ؟ نهال : انا فكرت عندكم الناس بتطلع تتفرج علي الشقه مكنتش ممانعه عادي لو اهلك عايزين يتفرجو وكدا بس محدش يدخل اوضة النوم دا طلبي
ادهم ابتسم : اااه انتي تقصدي امي ومرات اخويا وكدا يعني نهال بسرعه : متفهمنيش غلط والله هما علي دماغي وراسي بس اوضة نومنا بلاش حد يدخلها مش حابه كدا فاهمني ادهم : فاهمك فاهمك متقلقيش محدش طالع خليكي معايا ثواني كدا ” وطلع البلكونه ونادي بصوت عالي” صلااااح صلاح بصله من الشارع : ايييه يا ادهم ادهم : اقفل محبس الخزان يلااا الدنياا هتغرق مايه ” صلاح شاورله بموافق ” نهال سمعاني نهال : سمعاك هي العزبه عندكم عامله ازاي اشرحها ؟
ادهم بتلقائيه: متتشرحش هي بتتشاف وتتحس بس لكن الشرح مش موجود ليها بكرا تشوفيها وتعبري وتشرحي براحتك نهال ضحكت من كلامه : كلامك كله يطمن عندي امل كبير ان هنزل اجري في الاراضي لما الدنيا تشتي المنظر في بالي ادهم ضحك علي تخيلها وهو بيربط اوكرة الباب اللي لسه متركبتش : خيالك ميسرحش اوي كدا اراضي ايه اللي تجري فيها انتي فاكره نفسك مرزعه دا عزبه يا نهال بهايم ودبان وتراب عندنا هنا اللي تمشي وماسكه ايد جوزها تبقي مسيطره عليه عليكي تفهمي الباقي بقا
” نهال حست انها مش داخله علي عيله جديده وبس دي كمان داخله دنيا جديده وعالم جداد ” ادهم فونه رن وهو بيكلمها بص فيه وكان الراجل بتاع الستاير : نهال هقفل ارد علي بتاع الستاير علشان شكله تحت البيت طالع يركبهم وهكلمك تاني نهال : خلاص ماشي مع السلامه ” وقفلت معاه ” زينب دخلت عليها الاوضه بلهفه : نهال ناقص بطنيه متعرفيش هي فين ؟ نهال سابت فونها بصت فوق الدولاب : ما اهي يوم ما جبتيها قولتلك نزليها المخزن مع باقي الحجات انتي اللي كسلتي حطتها فوق الدولاب
زينب ابتسمت براحه : طيب الحمدالله انها مضاعتش هبعت احمد ابن عمك ينزلها نهال بتردد : ماشي بس كنت عايزه منك فلوس زينب بستغراب : عايزه فلوس ليه في حاجه ناقصه ولا ايه ؟ نهال بدأت تفرك اديها في بعضها بتوتر : مش هلف وادور عايزه اجيب مجموعة الحمام المغربي وسألت عليها قالو الاصليه ب ٧٥٠ جنيه ادهم مديني فلوس بس برضو مش عارفه اسحب منهم محروجه زينب ضحكت علي بنتها : لاء متسحبيش حاجه من فلوس ادهم خليهم معاكي وهديكي انا فلوس تجيبي اللي نقصك بس مين اللي هيعملو ليكي
نهال : انا هعمله لنفسي في بيتنا هنا شنطة المكياج والعطور فين ؟ زينب : طلعتها علشان هتروح في العربيه الشقه نهال قامت وقفت وبصت لأمها بتوتر : بصي اكيد انتي هتروحي مع العزال وهي راحه شنط هدومي وكل حاجه خاصه بيا اعرفيها ودخليها اوضة النوم ومحدش يفتحها غيرك زينب بدهشه : في ايييه يا نهال انتي محبكه الموضوع كدا ليه ؟ نهال بزهق : يا ماما اعملي زي ما بقولك وخلاص انتي خسرانه ايه يعني انا مش عايزه حد يشوف حاجتي
زينب : طيب خلاص متقلقيش علي ضمانتي الموضوع دا يلا روقي كدا وشوفي وراكي ايه علي ما انزل اشوف الناقص انا ونجوي ” وسابتها ونزلت علي تحت ” ” نهال طلعت البلكونه وسندت علي الصور وفضلت تبص علي الشارع وتفكر هي لو كانت قابلت ادهم في وقت غير اللي هي فيه دا كانت ممكن تحبه ، وليه لاء هي متنكرش ان شخصيته عجباها وطريقة تفكيره عجباها قطع تفكيرها الجرس اللي بيرن قامت فتحت ” احمد بغلاسه : امك بعتاني اخد البطنيه من فوق الدولاب يا عروسه انتي اتجوزي وورطي اهلي في بدله بشيئ وشويات
نهال بصتله بقرف : ادخل يلااا مش ريقالك البطنيه فوق الدولاب اللي في اوضتي خدها احمد بلوية بوز : مش رايقه ليه يمااا مصيبه ليكون العريس مزعلك مع ان اشك والله العظيم نهال لسه هترد ادهم اتصل ف ردت عليه : الوو احمد من الاوضه بضحك : يخربيت ام الرقه المزيفه ادهم سمع صوت احمد فقال بستفسار : انتي فين ؟ نهال : انا في بيتنا بس احمد طلع ياخد البطانيه من فوق الدولاب ينزلها لماما
ادهم بستغراب : ااه يعني افهم من كلامك ان انتي واحمد في بيتكم لوحدكم وماما تحت نهال بتلقائيه : اه بالضبط كدا ادهم بنرفزه : هو ايييه اللي بضبط كدا انتي قاصده تنرفزيني احمد ايه اللي مطلعه فووق وانتي لوحدك نهال : يا ادهم ما انا قولتلك طلع ياخد البطانيه من فوق الدولاب ادهم بنرفزه اكبر : برضو بتقولي بطانيه يحر.ق ابو البطانيه ياستي نهال بضيق : انت متنرفز ليه ما انا قولتلك اللي حصل اعمل ايه تاااني
ادهم بعصبيه : ياستي ولا تعملي ولا اعمل ابعتيلي صورة البطاقه بتاعتك علي الواتس وخلاص مع السلامه ” وقفل ” نهال نزلت الفون من علي ودنها بدهشه : دا قفل في وشي ايه اللي هو بيعمله دا ” ورنت عليه تاني كنسل اتغاظت اوي منه ” احمد اخد البطانيه : نهال انا اخدت البطانيه و نازل عايزه حاجه نهال : لاء شكرا اقفل باب البيت وراك والنبي علشان القطط متدخلش …………………………………… ” ادهم قاعد في اوضتة هيتجنن ”
ادهم بعصبيه : دا اللي يعصبك اكتر انها بتتكلم بكل برود ومش فاهمه فين المشكله ” بعدين ادرك انه بيكلم نفسه ومش حاسس ” معقول اكون وصلت لدرجة ان اكلم نفسي ؟ صلاح خبط خبطه علي الباب ودخل : ايه يا عريس حابس نفسك في الاوضه ليه لسه بدري علي الحبسه دي ادهم بصله بغيظ : كملت بيك يا عم صلاح رقم واحد متدنيش اي نصايح تحت مسمي انك مجرب الجواز انت كدا كدا مش نافع اصلا رقم اتنين خدلك جنب مني اليومين دول علشان روحي في مناخيري
صلاح دخل وقفل الباب وراه : اوب اوب هي العروسه بدأت جولة النكد بدري اوي كدا ليه بس اسمع مع اول مشكله بتحصل بينكم هي بتاخد بتفهم وضعك هيبقي ازاي لو من انت هديت وقولت مشكله وتعدي هي خلاص يمعلم فهمت انك تتساب وقت ما تهدي واكيد هترجع تكلمها ف بعد كدا هتسيبك انت اللي تصالح وتدادي رغم ان هيا اللي غلطانه لكن لو بقيت حمش ومش من النوع اللي يتصالح بسهوله ومرمطها والله هتبقي خاتم في صباعك
ادهم بنرفزه : يابني انا هخليها خاتم في صباعي ليه انا عايزها تفهم ان الحاجه دي مينفعش تعملها بعد كدا علشان خلاص هتبقي ست متجوزه وفي حياتك راجل مبيقبلش بالغلط بص سيبك من القصص اللي ملهاش لازمه دي كلها ابوك فين صلاح : ابوك دخل ينام ساعه قبل ما العزال تيجي ادهم اخد فونه في جيبه ومحفظته ومفتاح العربيه : طيب انا رايح مشوار ١٠ دقايق عشان لو حد سأل عليا صلاح بستغراب : رايح فين كدا ؟
ادهم بصله : هروح اجيب صندوقين كاكولا يتوزعو علي الناس اللي هتيجي دي واجي يلا سلام ” وسابه ونزل ركب عربيته ومشي ” ” في المطبخ ” ” نوال واقفه بتجهز غدا وبتغسل المواعين ، وغزل قاعده جنبها علي رخامه المطبخ بتعيط من غير سبب ” نوال : خلاص يا غزوله بطلي عياط يقلبي وانا هجيبلك كل اللي انتي عيزاه سلوي دخلت المطبخ بصت لنوال : نوال اعمليلي كوباية شاي حاسه ان الصداع هيفرتك دماغي
نوال : حاضر هخلص بس غسيل الرز وهعملك كوباية شاي سلوي : طب ما تولعي علي البراد جنبك علي الشاي وانتي بتغسلي الرز يكون غلي ايه اللي هيحصل يعني نوال غمضت عينها بغ*ضب وهي عينها للحوض : حاااضر دلوقتي هولعلك عليه واجيبلك كوباية الشاي لحد عندك متتعبيش نفسك انتي انا هعمل الشاي وهسكت غزل وهعمل الغدا وهنضف البيت وفي الاخر مبعملش حاجه برضو سلوي بعصبيه : انتي عايزه ايه يعني شيفانا فرحانين قولتي انكد عليهم شويه صلااااح صلااااح
صلاح جيه علي صوت امه : في ايه يمااا بتزعقي ليه سلوي بعصبيه : والله شوف مراتك اللي فرغت عينها من الكل ومحدش عاد قادر يكلمها بقولها اعمليلي كوباية شاي مش الصداع هيكس.ر دماغي ومش قادره اقف اعمل اديتني موال كأنها اللي شايله البيت يا اخي ربنا ميحوجني لحد ” وسابت المطلخ وطلعت ” صلاح بص لمراته بغ*ضب : يعني حتي كوباية الشاي مش طايقه تعمليها الوليه بتقولك تعبانه ومش قادره تقف اعتبريها امك ياستي والنبي هقولك ايه بعد كل اللي بقوله ” سابها وطلع من المطبخ ”
نوال غمضت عينها ودموعها نزلت قالت بهمس : في ايه بتعيطي ليه انتي مفكره انه هيجي ينصفك المفروض تكوني اتعودتي ” وبصت لابنتها اللي بتعيط وعماله تزن شالتها وطلعت علي شقتها سابت الكل ” ………………………….. ” في حدود الساعه ٤ العصر ” ” اكتر من عربيه شايله عفش نهال ووصلو البلد والعربيات بتزمر علي اساس بيزفو العزال في عربيه ملاكي راكب راشد ورامي واحمد وفي توكتوك وراهم نجوي وزينب ”
” قدام البيت واقف سالم والشيخ عطيه وصلاح وادهم وفي برندة البيت وقفه لمياء وجمليه وسلوي بيزغرطو وفي الدور التاني واقفه نوال في البلكونه هي وبنتها واهل العزبه كلهم بيتفرجو علي العفش اللي جاي ” راشد نزل من العربيه : يلا يرجاله علي اقل من مهلكم وطلعو العزال بنظام علشان مفيش حاجه تتكس.ر ” وفعلا العزال الرجاله بدأت تطلعهم وادهم معاهم وايده في كل حاجه ” في البرنده ” زينب طلعت وسلمت علي ام ادهم : العوافي عليكم
سلوي حض.نتها بحب : نورتي العزبه كلها يا ام نهال والله العظيم ” وبصت للمياء ” دي ام نهال ” وبصت لزينب ” ودي لمياء اختي زينب حض.نتها : اتشرفت بيكي يحبيبة قلبي كنا عايزين نطلع علي الشقه علطول اتحرجنا من الرجاله سلوي جابت كراسي : اقعدو بس الاول كدا علي ما نجيب الحاجه الساقعه نشربها وبعدين اطلعو الشقه شوفو هتعملو فيها ايه براحتكم لمياء : انتو هتفرشو النهارده ولا ايه ؟ زينب : الفرح الخميس الجاي ومفيش وقت ربنا يدينا الصحه انا ونجوي ونفرشها النهارده علشان بكرا هوصي علي كحك وبسكوت الصباحيه ومش هبقي فاضيه
سلوي ببتسامه : ربنا يعينكم يارب ويديكم الصحه واحنا معاكم اهو برضو لو احتاجتو حاجه هنيجي نساعدكم زينب ابتسم بمجامله : متحرمش منك ابدا يحبيبتي ” وفضلو قاعدين لحد ما العزال كلها طلعت الشقه ، ادهم راحلهم البرنده ” ادهم : ام نهال العزال كلها طلعت الشقه لو عايزه تطلعي اطلعي زينب ابتسمت وقامت وقفت : طيب هنطلع احنا علشان نشوف هنعمل ايه ” وطلعو علي الشقه ” سلوي : ادهم هي جايبه شاشتين ولا شاشه واحده ؟
ادهم لسه هيرد علي امه فونه وكانت نهال بص لامه : ثواني يما جايلك ” وبعد شويه وفتح عليها ” الوو نهال بضيق : مبتردش علي الواتس ليه وكل ما ارن تكنسل عليا ليه ؟ ادهم بنرفزه من عدم تقديرها : مبردش عليكي علشان مش فاضي بطلع العزال وبحاسب العربيات وبتأكد حاجه اتكس.رت ولا لاء وميت حوار بعمل فيه لوحدي
نهال حست فعلا انه مضغوط ف اتكلمت بهدوء : هاخد من وقتك دقيقه وبعدين هسيبك تكمل اللي وراك اولا احمد ابن عمي اكبر مني بسنه اتربينا سوا انا بعتبره اخويا علشان معنديش اخوات وهو كذابك بيعتبرني زي تغريد وضحي اخواته ممكن تمون فهمتني غلط انه هو هنا وماما مش موجوده بس دا مش اول مره يعملها من قبل ما تدخل حباتي وهو بيعمل كدا ف عادي بنسبالي مكنتش اعرف انك هتضايق
ادهم اتبسط لما اعترفت بغلطها بس اتكلم بنبرة عاديه : شوفي انتي قولتي ايه من قبل ما ادخل حياتك يعني انتي دلوقتي تراعي شكلي وتراعي احساسي ك راجل لو هو مين ملوش الحق يفضل معاكي في الشقه لوحدكم يعني ايه اكلم مراتي تقولي انا مع احمد بياخد البطانيه والنبي دا كلام ؟ نهال اتنهدت وردت : انا اسفه وحقك عليا اتمني متزعلش مني ادهم ببتسامه : مش زعلان يا قمر المهم مضطر اقفل علشان سايب الدنيا تضر.ب تقلب ورايا وجيت اكلمك
نهال ابتسمت : يلا مع السلامه ” وقفلت معاه وهي مبتسمه بس مبتسمه ليه متعرفش السبب بس كل اللي مسيطر عليها كلمة مراتي قد ايه كلمه غريبه بنسبالها بس ليها متعه خاصه في نفس الوقت ” …………………………….. ” في شقة نوال ” ” جرس الباب رن راحت فتحت وكانت جميله ” نوال : تعالي يجميله ادخلي جميله دخلت بعد ما قلعت الشبشب : مشوقتيش العزال ولا ايه ؟ نوال ببتسامه: شوفتهم من البلكونه عندي بسم الله مشاء الله حاجتها كلها روعه
جميله : علي فكره حاجتها مش الواو بالله في مطبخ اسود وجايبه التلاجه فريش يعني حاجتها فيه الاحسن منها برضو نوال بتنهيده : ياستي جابو علي قد مقدرتهم ايه اللي حصل يعني بعدين الجوازه جت في ثانيه في ثانيه يعني ملحقوش برضو كتر خيرهم جميله : اصلا امها كانت تحت مرتحتلهاش كدا ” لما ملقتش رد من نوال غيرت الموضوع ” طيب هسألك سؤال بنسبالك جوار عن حب ولا جواز صالونات نوال اخدت نفس كبير وطلعته : في مثل بيقولك خدي اللي يحبك ومتخديش اللي تحبيه طبقي المثل دا علشان اكتر حاجه صدقتها هو المثل دا واقعي بشكل مرعب
“” انتظرو القادم “” الفصل السادس 6 ” زينب ونجوي فضلو من الساعه ٥ المغرب لحد الساعه ١٠ بليل وهما بيفرشو في الشقه ، قعدو علي الصالون في شقة ادهم بتعب وارهاق ” نجوي بتعب : قومي هاتي ازازة المايه اللي علي البار مش قادره اقوم روحي طلعت زينب بصت علي ازازة المايه اللي علي البار بتعب : انا حاسه ان الازازه دي في اخر العالم لو قادره اقوم اشرب هقوم نجوي قامت بوجع : ضهري اتقطم يولاااد ” وجابت ازازة المايه شربت وناولتها لزينب ” كدا اوضة الاطفال واوضة النوم خلصو الباقي كله سهل بقا
زينب بصت علي باقي الشقه المكركبه بتعب : احنا نروح وبكرا نروح عند الراجل بتاع الكحك ونرجع نكمل باقي الشقه ” وفونها رن ” الوو ايه ينهال نهال : ايه يا ماما انتي اتأخرتي كدا ليه معقول كدا دا مخلصتوش ؟ زينب : نخلص ايه دا احنا عملنا اوضة النوم واوضة الاطفال وقفلناهم وادهم جاب الكهربائي ركب التكييف والنجف كله ولسه الصالون والصاله والمطبخ معملناش فيهم حاجه نهال بدهشه : لييه هي الشقه كبيره اوي كدا ؟
زينب : اه كبيره عكس ما توقعت خالص اوضة النوم فيها حمام خاص والمطبخ كبير اوي الراجل قعد ٣ ساعات يركب فيه كنا خلصنا فرش اوضة النوم نهال : طيب وهدومي اترتبو في الدولاب ؟ زينب بتنهيده : اه كله خلص اللي عايز يطبق طبقناه واللي عايز يتعلق علقناه وقفلنا الاوضه وادهم خد المفتاح بتاعها معاه نهال بدهشه : وادهم اخد المفتاااح لييه كنتي تخديه معاكي انتي زينب بعصبيه : يوووه انا هاخد مفتاح اوضة نومك انتي جوزك ليييه متخلي عندك عقل يابت انتي في اييه
نهال بضيق : ما هو ممكن يفتحها ويشوف حجااتي زينب بزعيق : ما يشوف يا متخلفه انتي عبيطه ولا ايه دااا هيبقي جوزك يعني الهدوم اللي انتي خايفه يشوفها وهي في الدولاب دي هيشوفها عليكي يلاا سلام مش فاضيه انا شويه وجايه ” وقفلت في وشها ” نجوي : في ايه بتزعقي للبت كدا ليه ؟ زينب بتنهيده : البت دي مش نافعه في الجواز وهتغلب ادهم البت خايفه لادهم يدخل يفتح الدولاب يشوف هدومها عيزاني اخد مفتاح الاوضه وانا مروحه وزعلانه انه اخد المفتاح والنبي دا كلام يرضي حد
نجوي بضحك : يحزن الحزن عليك يا ادهم وعلي اللي هتشوفه علي ايد نهال هتوريه النجوم في عز الضهر يلا يلا خلينا نشوف هنعمل ايه خلينا نخلص علشان نمشي ” قامت زينب ونجوي كملو ترتيب في الشقه وهما مش حاسين ولا بالوقت ولا بتعبهم ” ” ادهم رن جرس الشقه وفي ايده صنية كبيره عليها اكل ، فتحت زينب الباب ” زينب ببتسامه : يعني انت مكلف نفسك ليه يا ادهم
ادهم ببتسامه : مكلف نفسي ايه انا عملت حاجه ولا في حاجه من مقامكم ” وحط الاكل علي طربيزة السفره ” يلا هسيبكم انتو تكملو شغلكم ولو احتاجتو حاجه نادي عليا ” زينب ابتسمت : حبيبي ربنا يجعل الخير دايم عندكم والله يا ادهم انت طيب صعبان عليا انك واقع حظك مع نهال ادهم ضحك : ياستي انا طيب مع الطيب بس نهال والله قلبها طيب هي بس بتدعي القوه زينب : ربنا يخليكم لبعض ويهنيكم يحبيبي يارب
ادهم ببتسامه : اللهم امين يارب يلا اسيبكم انا ” وقفل الباب ونزل علي تحت ” سلوي قابلت ادهم علي السلم : هاا خلصو ولا لسه ؟ ادهم : الشقه فوق بعضها لسه يدوب خلصو اوضة النوم والاطفال وقفلوهم سلوي بدهشه : يووه من العصر لحد دلوقتي وهما في اوضتين طب اعمل ايه اطلع ابص عليهم ولا مطلعش ادهم باس راسها : متتعبيش نفسك يا ست الكُل بكرا الشقه تخلص كلها هاخدك تتفرجي براحتك ودلوقتي عايز كوباية شاي من ايدك الحلوه دي
سلوي ببتسامه : عنياا ليك يا روح قلبي ” ونزلت من علي السلم دخلت علي المطبخ تعمل شاي ” ……………………………. ” في بيت زينب في دكرنس ” ” تغريد وضحي واقفين قدام باب الحمام ماسكي.ن فوط وعلبة كريما.ت كبيره ، ونهال في الحمام بتعمل الحمام المغربي ” تغريد خبطت علي باب الحمام : هااا خلصتي ولا لسه نهال بضيق : انا جسمي احمر الليفه دي عقاااب سلخت جسمي تغريد بضحك : ياستي كل دا طبيعي علشان الليفه لتقشير الجسم المهم خلصتي
نهال فتحت الباب وهي لافه جسمها بفوطه وقالت بضيق : جسمي كله بيحر.قني ياريتني ما عملته في برطمان ازرق ريحته حلوه اوب دا لإيه تغريد : دا بيخلي ريحة الجسم حلوه مهما بتحطي مايه برضو الريحه بتفضل ثابته علي الجسم عملتي منه نهال بصتلها وهي حاسه ان جسمها بترعش من البرد : عملت بس ادهنيلي ضهري وكدا اكون خلصت وانجزي علشان جسمي متلج من البرد ضحي طلعت من البلكونه وفي ايدها فون نهال : فونك رن ٣ مرات بس انا مردتش
نهال بستغراب : مين اللي بيرن عليا ؟ ضحي فتحت الفون : علي الاغلب ادهم علشان الرقم متسجل بِ اموجي الدبله دا نهال اخدت منها الفون ورنت علي ادهم اللي رد بعد شويه : الوو ادهم بنرفزه : ميتين ام فووونك فين بقالي نص ساعه برن عليكي فييينك ؟ نهال استغربت نرفزته فردت بهدوء : كنت مشغوله ومسمعتش الفون في ايه اللي حصل ادهم بصوت عالي : ايوااا مشغوله في ايه الساعه ١٢ بليل وانتي لوحدك في البيت فكرت حصلك حاجه
نهال ابتسمت علي قلقه عليها : انا مش لوحدي معايا تغريد وضحي ومتقلقش انا كويسه ماما خلصت ولا لسه ؟ ادهم سكت شويه ومسح وشه بإيده ورد بهدوء : لسه باقي المطبخ الشقه كلها خلصت الحمدالله نهال بستنكار : انت لسه متنرفز ؟ ادهم بهدوء : لاء مش متنرفز انا مضغوط مش اكتر ولما اتصلت عليكي وملقتش رد قلقت عليكي نهال بصت للبنات وعملت كتم : بنات دقايق وجايا ” ودخلت علي اوضتها وقفلت الباب ” مضغوط من ايه ؟
ادهم اتنهد بقوه : في مشاكل في المصنع في السعوديه وبحاول احلها بالفون بس شكل الموضوع مش نافع نهال : يعني ناوي علي ايه ؟ ادهم : ربنا يسهل انا كلمت ناس صحابي هناك وفهمتهم الوضع يمكن يحلو الدنيا والموضوع يتقفل لما نشوف المهم انتي كنتي بتعملي ايه ؟ نهال معرفتش تقول ايه فَ ردت بتوتر : مكنتش بعمل حاجه ادهم بستغراب : قولتي كنت مشغوله فَ كنتي مشغوله في ايه ؟ ” نهال كحت في الفون بتوتر وخجل ومعرفتش ترد ففضلت ساكته ”
ادهم بدهشه : سر في الدوله وخايفه تقولي ولا ايه ؟ نهال وشها احمر من الإحراج : اصل مش حاجه مهمه يعني حاجه عاديه ادهم بدء يحس انه امر خاص ف حب يضايقها : اوك ايه هي الحاجه العاديه دي حابب اعرفها ولا مش من حقي ؟ نهال اتنفست بصوت مسموع من شدة التوتر : لاء من حقك محدش قال حاجه بس يعني هي ” وكحت ” حاجة بنات ملكش فيها ادهم ضحك لانه متخيل شكلها : كنت حاسس والله المشكله ان انا متخيل شكل وشك عامل ايه دلوقتي
نهال بضيق : والله انك انسان مستفز ولو سمحت اقفل لان ورايا حجات كتير ادهم بضحك : متزقيش طاااايب محدش يعرف يهزر معاكي ولا اي نهال ضحكت علي كلامه وقالت ببتسامه : فعلا لازم اقفل لان ورايا حجات مستعجله هخلص وهكلمك ادهم ابتسم بتفهم : خلاص تمام مع السلامه ” وقفل وهو مبتسم اوي ، مستغرب نفسه ازاي غارق في تفاصيلها بشكل دا وهو مكنش مهتم بأي ست ربنا خلقها اصلا ” نهال قفلت الفون وهي بتترعش من البرد فتحت الدولاب طلعت هدوم ليها ولبستها : يخريب التلج اللي في الدنيا همووت من البرد يعالم
…………………………….
